Патрик Виейра «Женоа» билан шартномасини узайтирди
“Женоа” бош мураббий Патрик Виейра билан шартномани узайтирганини эълон қилди.
Манбага кўра, 48 ёшли франциялик мутахассис жамоа билан 2027 йилнинг 30 июнига қадар мўлжаллаган битимни имзолади.
“Ўтган йилнинг ноябрь ойида Генуяга келганимдан бери жуда шиддатли давр бўлди. Биз “Женоа”ни А Серияда сақлаб қолишга муваффақ бўлдик ва мавсумни ғурур билан якунладик. Чунки клуб бунга лойиқ.
Мен Генуяда жуда бахтлиман. Муносабатларимизни кенгайтириш энг табиий қадам бўлди. Энди дам олиш вақти келди, лекин биз кейинги мавсум бошланишига тайёргарлик кўриш учун кўпроқ меҳнат қиламиз”, - деди Виейра клуб расмий сайти билан cуҳбатда.
Эслатиб ўтамиз, Виейра “Женоа” клубини 2024 йил ноябрь ойи охирида қабул қилиб олди. Унинг қўл остида жамоа ўтган мавсум А Серияда 13-ўринни эгаллади.
