Қозоғистонлик депутат — Ўзбекистон терма жамоасининг муваффақияти ва ўзимиздаги муаммолар ҳақида
Қозоғистон парламенти депутати, «Республика» фракцияси раҳбари Айдарбек Хўжанаҳаров Sports24.kz нашрига берган интервьюсида Ўзбекистон миллий терма жамоасининг Жаҳон чемпионати финал босқичига йўл олганини эътироф этди ва бу борада ўз фикрларини билдирди.
«Қозоғистон ўз камчиликлари устида ишлаши керак. Биз кўпинча “Ўзбекистон чиқди, нега биз йўқ?” деб сабаб излаймиз. Лекин бошқаларга қараб эмас, ўз ишимизга жавобгар бўлишимиз шарт. Бир неча йил аввал Исландия каби кичик давлат Европа чемпионатига йўлланма олди. Бизда битта туманда Исландиядагидан кўпроқ одам яшайди. Ҳатто об-ҳаво ҳам яхшироқ, аммо натижа йўқ. Демак, муаммо ўзимизда», — дейди депутат.
Эслатиб ўтамиз, аввалроқ Қозоғистон президенти Қосим-Жўмарт Тўқаев Астанадаги “Марказий Осиё — Хитой” саммитида Ўзбекистон Республикаси президенти Шавкат Мирзиёевни терма жамоанинг Жаҳон чемпионатига йўл олгани билан шахсан табриклаган эди.
