Олисе «Реал»га ўтишга тайёр – манба
«Бавария» қанот ҳужумчиси Майкл Олисе Мадриднинг «Реал» клубига ўтишга тайёр. Бу ҳақда Madrid Universal аккаунти ўзининг Х ижтимоий тармоғидаги саҳифасида журналист Рамон Альварес де Монга таяниб хабар берди.
Манбага кўра, «қаймоқранглилар» франциялик футболчининг улар сафига ўтиш истагидан хабардор ва шу сабабли келаси ҳафта уни сотиб олиш бўйича таклиф билан чиқмоқчи.
Аввалроқ «Қироллик клуби» президенти Флорентино Перес келаси сешанба куни номи ошкор этилмаган футболчининг трансфери учун 150 миллион евро таклиф қилишини эълон қилганди. Кейинроқ AS нашри бу ўйинчи Олисе эканлигини маълум қилди.
Ўтган мавсумда Олисе барча мусобақаларда 52 та ўйинда иштирок этиб, 22 та гол ва 31 та голли узатма муаллифига айланди. Футболчининг клуб билан амалдаги меҳнат шартномаси 2029 йилнинг ёзига қадар мўлжалланган. Transfermarkt порталида тақдим этилган маълумотларга кўра, футболчининг бозор қиймати 150 миллион еврони ташкил этади.
