«МЮ» Каземиро билан шартномани узайтирмоқчи
«Манчестер Юнайтед» 33 ёшли таянч яримҳимоячиси Каземиро билан тузилган шартномани узайтириш имкониятини кўриб чиқмоқда. Бу ҳақда ESPN нашри хабар берди.
Манбага кўра, бразилиялик футболчи «қизил иблислар» сафида қолишни истаса, маошини камайтиришга рози бўлиши керак бўлади. Клуб раҳбарияти Де Хеа, Варан ва Решфорд билан хайрлашганидан сўнг иш ҳақи фондини қисқартириш сиёсатини давом эттирмоқда. Ҳозирда Каземиро клубдаги энг юқори маош олувчи футболчилардан бири саналади.
Хабар қилинишича, тажрибали яримҳимоячига Бразилия ва Саудия Арабистони жамоаларидан ҳам қизиқиш бор.
Маълумот учун, Каземиро 2022 йилнинг ёзидан буён «Манчестер Юнайтед» сафида тўп сурмоқда. У жорий мавсум АПЛда 6 та ўйинда майдонга тушиб, 1 та гол уришга муваффақ бўлди. Унинг Transfermarkt'даги нархи 10 миллион евро деб баҳоланмоқда.
