Модрич «Милан»га Лунини қўлга киритишда ёрдам бериши мумкин
Украиналик посбон қишки трансферлар вақтида «Реал»ни тарк этиш ҳақида ўйламоқда.
ФОТО: Getty Images
«Милан» украиналик дарвозабон, Мадриднинг «Реал» клуби посбони Андрей Лунин билан жиддий қизиқиб қолган. Бу ҳақида инсайдер Экрем Конур X ижтимоий тармоғида маълум қилди.
Манбага кўра, «қироллик клуби»нинг собиқ юлдузи Лука Модрич «россонерилар»га Лунини янги лойиҳага кўндиришда ёрдам бериши мумкин.
26 ёшли Лунин «Реал»га 2018 йили келган ва ҳозирча асосан захира дарвозабони сифатида ўйнаб келмоқда. Жорий мавсумда у атиги битта учрашувда майдонга тушган — Чемпионлар лигасида «Олимпиакос»га қарши ўйинда (4:3).
Луниннинг Мадрид клуби билан тузган шартномаси 2030 йил июн ойининг охиригача амал қилади. Transfermarkt портали унинг бозор қийматини 18 миллион евро деб баҳоламоқда.
Насрулло Каримов
Журналист
