Месси жаҳон чемпионатларидаги голлар бўйича ўзининг тарихий рекордига изоҳ берди
Аргентина терма жамоаси ҳужумчиси Лионель Месси футбол бўйича 2026 йилги жаҳон чемпионати гуруҳ босқичида Жазоир миллий терма жамоасига қарши ўйиндаги хет-трикдан сўнг ўзининг тарихий ютуғи ҳақида фикр билдирди. J гуруҳининг 1-тур учрашуви Аргентинанинг 3:0 ҳисобидаги ғалабаси билан якунланди.
«Ростини айтсам, бу рўйхатда бўлиш мен учун катта шараф, лекин, охир-оқибат, бу шунчаки статистика бўлиб қолади. Бу шунчаки статистика. Бу унчалик кўп нарсани англатмайдиган оддий бир рақам. Мен эришган барча нарсаларимдан мамнунман. Тўғрисини айтсам, ҳозир яшаётганимнинг ҳаммаси — тақдир инъоми. Худонинг марҳамати билан якка ва жамоавий даражада ҳамма нарсага эришдим, энди эса бошқа бир босқичда яшаяпман ва бундан завқланяпман. Мен шунчаки ҳар бир лаҳзадан завқ оламан», — дея Мессининг сўзларини келтиради The Touchline X ижтимоий тармоғида.
Таъкидлаш жоизки, якунланган учрашувда Месси жаҳон чемпионатларидаги голлар бўйича Мирослав Клозенинг рекордини такрорлади. Аргентина терма жамоаси навбатдаги ўйинни 22 июнь куни Австрияга қарши ўтказади.
