Мбаппе жорий мавсум «Реал»нинг ярмидан кўп голига муаллифлик қилди
Мадриднинг «Реал» клуби ҳужумчиси Килиан Мбаппе жорий мавсумда «қаймоқранглилар» урган барча голларнинг 55,3 фоизига муаллифлик қилди. Бу ҳақда The Touchline нашри X ижтимоий тармоғида хабар берди.
Ла Лиганинг 16-турида «Алавес»га қарши баҳсда Мбаппе «Реал»нинг биринчи голини киритди. Учрашув Мадрид клуби фойдасига 2:1 ҳисобида якунланди.
Мбаппе «Реал» сафида 2024 йил ёзидан бери тўп суриб келмоқда. Аввалроқ у «Пари Сен-Жермен» ва «Монако» клубларида ўйнаган. Жорий мавсумда Франциялик ҳужумчи клуб миқёсида 25 та ўйин ўтказиб, 27 та гол урди ва 4 та голли узатма амалга оширди.
Килиан Мбаппенинг «Реал» билан амалдаги шартномаси 2029 йил июн ойининг охиригача мўлжалланган. Transfermarkt портали футболчининг бозор қийматини 200 миллион евроға баҳоламоқда.
