Мбаппе Олисени «Реал»га ўтишга ундамаслигини айтди
«Реал» клуби ҳужумчиси Килиан Мбаппе Майкл Олисени Испанияга кўчиб ўтиши ҳақидаги хабарларга муносабат билдирди.
Ўтган ёзда турли манбалар франциялик вингернинг «Бавария»дан кетиб, «қироллик клуби» сафига қўшилиш истаги борлиги ҳақида хабар берган эди. Потенциал трансфер Флорентино Перес учун «орзу трансфери» сифатида баҳоланганди.
— Бу миш-мишларни эшитганман. Мен билан ҳам худди шундай ҳолат бўлган. «ПСЖ»да ўйнаган пайтимда матбуотда мен ҳақимда жуда кўп миш-мишлар тарқалган. Менимча, Олисега «Бавария»дан кетишни маслаҳат беришим ҳурматсизлик ва нотўғри иш бўлади. Айниқса, «Бавария» буюк клуб эканини ҳисобга олсак. У ерда Майкл катта муваффақиятларга эриша олади. Албатта, ҳар қандай жамоа уни ўз сафига қўшиб олишни хоҳлайди. У ажойиб футболчи, — деди Мбаппе. Унинг сўзларини Bayern & Germany келтирди.
Майкл Олисениинг «Бавария» билан шартномаси 2029 йил ёзигача амал қилади.
