Мбаппе бир календар йилида урилган голлар сони бўйича Роналдуга яқинлашиб олди
Франциялик ҳужумчи Килиан Мбаппе 2025 йил давомида «Реал» сафидаги 56-голини урди. Футболчи Испания чемпионатининг 16-тури доирасида «Алавес»га қарши ўйинда (2:1) рақиб дарвозасини ишғол қилди.
Шу тариқа Мбаппе «Реал» таркибида бир календар йил ичида киритилган голлар бўйича Криштиану Роналдунинг рекордига яқинлашди. Эндиликда франциялик футболчи португалиялик афсонанинг натижасидан атиги уч гол орқада қолмоқда. Эслатиб ўтамиз, Роналду 2013 йилда «Реал» сафида 59 та гол урган эди.
2025 йил якунига қадар «Реал»ни яна икки учрашув кутиб турибди: Мадрид клуби Испания Кубонида «Талавера»га қарши баҳс олиб боради, чемпионат доирасида эса «Севилья» билан тўқнаш келади.
Килиан Мбаппе 2024 йилдан буён «Реал» шарафини ҳимоя қилиб келмоқда. Футболчининг клуб билан амалдаги шартномаси 2029 йилгача мўлжалланган. Жорий мавсумда у барча турнирлар доирасида 25 та учрашувда майдонга тушиб, 27 та гол ва 4 та голли узатма муаллифига айланган.
