Майкл Олисе — Бундеслигада мавсумнинг энг яхши футболчиси
Мюнхеннинг «Бавария» клуби вингери Майкл Олисе Германия Бундеслигасининг якунланган 2025/2026 йилги мавсумида энг яхши футболчи деб топилди. Бу ҳақда «Бавария» клуби расмий сайти хабар тарқатди.
24 ёшли футболчи жорий мавсумда ақлбовар қилмас кўрсаткич қайд этди. У чемпионат доирасида 32 та ўйинда майдонга тушиб, 15 та гол урди ва 19 та голли узатмани амалга оширди. Олисе бу натижаси билан турнирнинг энг яхши ассистентига ҳам айланди.
Майкл Олисе 2024 йилдан буён «Бавария» шарафини ҳимоя қилиб келмоқда. Ўтган вақт ичида у мюнхенликлар таркибида икки марта Германия чемпионлиги ва мамлакат Суперкубогини қўлга киритишга улгурди.
Эслатиб ўтамиз, якунланган мавсумда «Бавария» 34 та ўйинда 89 очко жамғарган ҳолда навбатдаги чемпионликни расмийлаштирди. Турнир жадвалида иккинчи ўринни Дортмунднинг «Боруссия»си (73 очко) эгаллаган бўлса, кучли учликни «RB Лейпциг» (65 очко) якунлаб берди.
