Мадриднинг «Реал» клуби АПЛ ҳимоячиларини эркин агент сифатида олишни режалаштирмоқда
Мадриднинг «Реал» клуби ҳимоя чизиғини кучайтириш ниятида, аммо катта маблағ сарфлашни истамайди. Marca нашри хабарига кўра, клуб «Ливерпул» аъзоси Ибраима Конате ва «Арсенал» футболчиси Вилям Салибага қизиқиш билдирган. Бироқ ҳар икки футболчининг баҳоси тахминан 100 миллион еврони ташкил этади, бу эса испанияликлар учун жуда қиммат.
Шу сабабли, «Реал» уларнинг шартномалари тугашини кутмоқчи ва трансфер тўловисиз олишни мақсад қилган. Конатенинг «Ливерпул» билан шартномаси 2026 йилгача, Салибанинг «Арсенал» билан шартномаси эса 2027 йилгача амал қилади.
Бундан ташқари, «Реал» яқин орада «Ливерпул» ҳимоячиси Трент Александер-Арнолдни ҳам эркин агент сифатида жамоага қўшиши кутилмоқда. Айни пайтда мадридликлар Ла Лигада иккинчи ўринда боришмоқда ва «Барселона»дан тўрт очко орқада қолишмоқда.
