Криштиану Роналду ОЧЛ-2 финалининг энг ёмон футболчиси деб топилди
«Ан Наср» ҳужумчиси Криштиану Роналду Sofascore таҳлилий портали талқинига кўра, ОЧЛ-2 финал учрашувининг энг ёмон ўйинчиси бўлди. Ар-Риёддаги «Kingdom Arena» стадионида кечган баҳсда Саудия Арабистони клуби Япониянинг «Гамба Осака» жамоасига кичик 0:1 ҳисобида имкониятни бой берди.
Ушбу ўйинда 90 дақиқа майдонда ҳаракат қилган португалиялик юлдуз 5,9 баллга лойиқ кўрилди — бу ҳар икки жамоанинг асосий таркибдаги 22 нафар футболчиси ва захирадан майдонга тушган 10 нафар ўйинчиси орасидаги энг паст кўрсаткичдир.
Мазкур бой берилган кубок Роналду учун Саудия Арабистонига кўчиб ўтганидан буён қўлдан чиқарилган 14-бўлди.
Шунга қарамасдан, «Ан Наср» жамоаси мавсумдаги бош совринни қўлга киритиш учун жуда яқин турибди. Шу ҳафта пайшанба куни, яъни 21 май санада Саудия Про-Лигаси 2025/2026 йилги мавсумига якун ясалади. Чемпионат тугашига бир тур қолганида «Ан Наср» 83 очко билан турнир жадвалида пешқадамлик қилмоқда ва энг яқин таъқибчиси «Ал Ҳилол»ни (81) икки очкога ортда қолдиряпти.
