Компани «Бавария» билан Чемпионлар лигасида ғолиб чиқишни мақсад қилган
«Бавария» бош мураббийи Венсан Компани жамоани Чемпионлар лигасида ғолибликка олиб келишни қатъий мақсад қилган.
Мюнхенликлар турнирдаги иштирокини Норвегиянинг «Буде-Глимт» клуби устидан 5:0 ҳисобидаги ғалаба билан бошлади. 13 октябрь куни Бундеслига гранди яна бир норвегиялик жамоа — «Викинг»га қарши майдонга тушади.
«Мавсум бошидаёқ Чемпионлар лигасида ғолиб чиқишни исташимизни аниқ айтган эдим. Аммо бу ҳақда фақат гапиришимиз мумкин бўлган босқич аллақачон ортда қолди — энди ҳаракат қилиш вақти. Аввало, умумий босқичдан ўтишимиз керак. Кейинги йўлимиз осонроқ ёки қийинроқ бўлиши мумкин, бу ҳам кўп нарсага боғлиқ. Охир-оқибат барча рақиблардан кучлироқ бўлишимиз керак, бу эса осон эмас. Аммо мақсад — мақсадлигича қолади ва у ўзгармайди», — деди Компани Sky Sport нашрига берган интервьюсида.
«Бавария» ўтган мавсумги Чемпионлар лигасида чорак финалга қадар етиб борган эди.
