Камолиддин Тожиев: «Рақибни менсимаслик ҳолати йўқ. Финалга кучсиз жамоа чиқмайди»
Ўзбекистон Кубоги финалидан аввал "Пахтакор" бош мураббийи Камолиддин Тожиев ва ярим ҳимоячи Сардор Собирхўжаев матбуот анжуманида иштирок этди.
Тожиев: - Ўйинга доимгидек тайёргарлик кўрдик. Жамоада кайфият яхши. Эртага мухлисларни ғалаба билан хурсанд этишга уринамиз.
Рақибни менсимаслик ҳолати йўқ. Финалга кучсиз жамоа чиқмайди. Буни йигитларга ҳам айтдим. "Бухоро" яхши ўйнай оладиган жамоа. Улар қарши ҳужумларда жуда яхши ҳаракат қилишади.
Биз ютуқ билан халқаро майдонга қайтишга ҳаракат қиламиз. Чемпионатда курашни охиригача давом эттирамиз. Таркибдаги футболчиларни сақлаб қолишга интиламиз ва юқори даражали ўйинчилар таклиф этиш режаларда бор.
Собирхўжаев: - Баҳсга яхши ҳозирлик қилдик. Бизни жуда яхши ўйин кутиб турибди деб ўйлайман.
Финал бир ўйиндан иборат. Ўтган йили "Навбаҳор" фаворит бўлган ҳолда ютқазганди. Чемпионатда уч очко учун курашилади, бу ерда эса соврин учун. Шу сабабли учрашувга жиддий ёндошамиз. Ҳужум қиладиган жамоага гол урмаган тақдирда босим ортиб боради, лекин бизда яхши савияли ижрочилар бор.
Клубимиз раиси Жаҳонгир Ортиқхўжаев билан ўйиндан олдин кўришмадик. Билишимизча, у эртага беллашувни стадиондан кузатади.
