Исломбек Исмоилов: «Умид қиламанки, Жаҳон чемпионатида ҳам яхши жисмоний ҳолат орқали ижобий натижа қайд этамиз»
Ўзбекистон U-17 терма жамоаси бош мураббийи Исломбек Исмоилов ва футболчи Азизбек Эримбетов иштирокида матбуот анжуманида иштирок этди.
Исломбек Исмоилов:
— Ҳужумчилар ҳақида
— Нурбек жамоа учун жуда жўп фойдаси теккан. Ҳозирги ҳолатда кўп ҳужумчиларга имконият берилди, бироқ улар терма жамоа даражасида ўйин намойиш этишмади. Биз гуруҳ босқичида чиқишни мақсад қилганмиз, Нурбек бизга гуруҳ босқичидан сўнг ёрдам беради, деб умид қиламиз.
— Жамоа олдига қўйилган вазифа
— Биз жамоа сифатида албатта ўз олдимизга юқори мақсад қўйганмиз. Умид қиламиз, жамоа яхши ўйин кўрсатиб, ижобий натижалар қайд этади.
— Карточкалар, четлатишлар ҳақида
— Осиё кубогидан кейин барчасини таҳлил қилдик. Хусусан, карточкалар бўйича ҳам. Бу ёш, биласиз, ўтиш ёши. Болалар ёш. Бироқ биз доимий айтиб, тушунтириб келяпмиз. Ўйлайманки, Жаҳон чемпионатида бундай хатолар бўлмайди.
— Пенальтилар серияси ҳақида
— Биласиз, машғулотда пеналти тепиш билан реал ўйинда тепиш умуман бошқа. Биз ҳозир илмий ёндошиб, рақибларни ҳам ўрганиб чиқяпмиз.
— Ўртоқлик учрашувлари ҳақида
— Бу ўйинларда тактика устида ишладик. Биринчи ўйинда майдон марказидаги ишланмаларни синовдан ўтказдик. Иккинчи ўйинда одатий 4-3-3 схемасини яна бир бор синовдан ўтказиб олдик. Бу ўйинлар жамоа фойдасига ишлади. Олдимизда Жаҳон чемпионати турибди, шу сабабли бор эътиборимизни ишланмаларга қаратдик.
Бу жамоа, ҳар бир учрашувда Ватан шаъни туради. Шу сабабли ҳар бир учрашувда футболчилардан максимал ўйин кўрсатишларини талаб қиламиз. Жаҳон чемпионати олдидаги ўртоқлик ўйинларида ҳам яхши натижа қайд этишга ҳаракат қиламиз.
— Жисмоний ҳолат ҳақида
— Доимий равишда футболчиларимизнинг жисмоний ҳолатини назорат қилиб борамиз. Осиё кубогида ҳам кўп жамоалар ўйиндан ўйинга жисмоний томонлама чарчоқ ҳис қилади, бизда эса аксинча — ўйиндан ўйинга ўзимизни яхши ҳис қила бошладик. Умид қиламанки, Жаҳон чемпионатида ҳам яхши жисмоний ҳолат орқали ижобий натижа қайд этамиз.
