Хаби Алонсо «Челси»га Килиан Мбаппени олиб келмоқчи
«Челси» клубининг янги бош мураббийи Хаби Алонсо «Реал Мадрид» ҳужумчиси Килиан Мбаппени Лондон клубига олиб келишга қизиқиш билдирмоқда. «Қаймоқранглилар» форварди фаолиятини Англияда давом эттириши мумкин, деб хабар бермоқда Football365 нашри.
Манба берган хабарга кўра, аристократлар аллақачон Мбаппенинг онаси ва шу билан бирга унинг агенти ҳисобланган Файза Ламари билан алоқага чиқишган. «Кўклар»нинг янги устози француз юлдузи билан «Стэмфорд Бридж»да қайта бирлашишни талаб қилмоқда. Испаниялик мутахассиснинг «Реал»даги фаолияти давомида ҳужумчи билан муносабатлари жуда яхши бўлган.
Маълумот учун, Килиан Мбаппе 2024 йилда Мадрид клуби билан 2029 йилнинг июнига қадар мўлжалланган шартнома имзолаган эди. Ҳужумчи жорий мавсумда «Реал» сафида барча турнирларда 43 та учрашувда майдонга тушиб, 41 та гол урди ва 7 та голли узатмани амалга оширди.
Эслатиб ўтамиз, 2026 йилнинг 17 май куни Хаби Алонсо расман «Челси» клуби бош мураббийи этиб тайинлангани эълон қилинган эди.
