Гринвуд фаолиятини «Барселона»да давом эттириши мумкин
«Барселона» Франциянинг «Марсель» клуби ҳужумчиси Мейсон Гринвуд билан шартнома имзолаши мумкин. Бу ҳақда The Sun нашри хабар берди.
Манбага кўра, каталониялик скаутлар Франция чемпионатининг 8-турида «Гавр»га (6:2) қарши ўйинда англиялик футболчининг ўйинини кузатган — айнан ўша баҳсда Гринвуд покер қайд этган.
Маълум қилинганича, «Барселона» вакиллари 24 ёшли ҳужумчининг ўйинидан ҳайратда қолишган. Шунингдек, клуб Гринвудга ҳали 2023 йили, у «Манчестер Юнайтед»дан «Хетафе»га ижарага ўтганда ҳам қизиқиш билдирган эди.
Жорий мавсумда Гринвуд барча турнирлар доирасида 12 та ўйинда майдонга тушиб, 8 та гол ва 4 та голли узатмага муаллифлик қилган. Футболчининг «Марсель» билан амалдаги шартномаси 2029 йил ёзигача мўлжалланган. Transfermarkt маълумотига кўра, унинг бозор қиймати 40 миллион еврони ташкил этади.
