Гасперини 9 йиллик фаолиятидан сўнг “Аталанта”ни тарк этишга қарор қилди
ФОТО: Getty Images
Италиянинг “Аталанта” клуби бош мураббийи Жан Пьеро Гасперини ўз лавозимини тарк этишга қарор қилди. Бу ҳақда журналист Маттео Моретто хабар бермоқда.
Манбага кўра, 67 ёшли мутахассис клуб раҳбарларини кетиши ҳақида аллақачон хабардор қилган. Унинг амалдаги шартномаси 2026 йилнинг ёзида якунга етади.
Феврал ойида Гасперини шартномасини узайтириш ниятида эмаслигини айтган, бироқ жорий мавсум охиригача клубда қолиш-қолмаслигига аниқлик киритмаган эди.
Қайд этилишича, “Рома” Жан Пьеро Гасперинига йилига 5 миллион евро маош билан 2028 йилгача шартнома таклиф қилмоқда.
Эслатиб ўтамиз, Гасперини 2016 йилдан буён “Аталанта”ни бошқариб келмоқда. Бу давр ичида у жамоа билан бир бор Европа Лигасида ғолиб чиққан (2024).
Насрулло Каримов
Журналист