Флорентино Перес Родри трансферидан воз кечди
Мадриднинг «Реал» клуби президенти Флорентино Перес «Манчестер Сити» ярим ҳимоячиси Родрини трансфер қилиш ғоясидан бутунлай воз кечган. Бу ҳақда Sport.es нашри хабар берди.
Манба маълумотига кўра, бундай қарорнинг асосий сабаби — «Реал» президентлигига собиқ номзод Энрике Рикельме сайловолди дастурида Родрини жамоага олиб келишни ваъда қилгани ҳисобланади. Перес эса рақибининг асосий ваъдаларидан бири билан боғлиқ трансферни амалга оширишни истамаган.
Нашрнинг таъкидлашича, бу вазият 2009 йилдаги Криштиану Роналду трансферига ўхшайди. Ўшанда клубнинг собиқ президенти Рамон Кальдерон португалиялик юлдузнинг «Манчестер Юнайтед»дан ўтиши бўйича келишувга эришган эди.
Флорентино Перес сайловда ғалаба қозонгач, Роналду трансферини бекор қилишга уринган, чунки бу келишув Кальдерон номи билан боғлиқ эди. Бироқ барча ҳужжатлар тайёр бўлгани сабабли у битимни тўхтата олмаган.
Родри масаласида эса вазият бошқача. Манбага кўра, испаниялик ярим ҳимоячининг «Реал»га ўтиши бўйича ҳеч қандай расмий келишув ёки ҳужжат мавжуд эмас. Шу боис мадридликлар ҳозирча уни трансфер қилиш режасини кун тартибидан чиқарган.
