Флик: «Саккизликдан жой олиш осон бўлмайди, лекин биз бор кучимизни сарфлаймиз»
«Барселона» бош мураббийи Ҳанс-Дитер Флик Чемпионлар лигаси умумий босқичининг 5-турида «Челси»га қарши кечган ва йирик мағлубият (0:3) билан якунланган баҳс ҳақида ўз фикрларини билдирди.
Мураббийнинг айтишича, учрашув бошида ҳисобни очиш учун жуда яхши имконият бўлган, аммо уни голга айлантириш имкони топилмаган.
«Бизда ҳисобни очиш учун яхши имконият бор эди, бироқ уни амалга ошира олмадик. Қарши томонда бундай рақиб бўлганида ўйинчи етишмаслиги жуда қийин кечди — биз жуда узоқ вақт ўн киши бўлиб ҳаракат қилишга мажбур бўлдик. Ижобий жиҳатлар ҳам бўлди, аммо кўп эмас. Биз тез-тез тўпни бой бериб қўйдик, узатмаларда содда хатоларга йўл қўйдик — буларни таҳлил қилишимиз шарт.
Қанчалик вақт камчиликда ўйнаганимизни аниқ айта олмайман, аммо у жуда кўп бўлди. «Челси» тўпга ишончли эгалик қилади, бунга тайёр туриш керак, бироқ биз ижобий кайфиятни сақлашимиз зарур. Саккизликка йўл топиш осон бўлмайди, аммо биз бор кучимизни сарфлаймиз», — дея Фликнинг сўзларини келтиради «Marca».
Эслатиб ўтамиз, 44-дақиқада каталонияликлар ҳимоячиси Роналд Араухо майдондан четлатилган эди. Ушбу натижадан сўнг «кўклар» 10 очко билан Чемпионлар лигаси умумий жадвалида 5-ўринни эгаллаб турибди, «блауграна» эса 7 очко билан 15-поғонада қайд этилган.
