FIFA «Барселона»га ЖЧ–2026 учун 2,8 миллион евро тўлаб беради
Халқаро футбол федерацияси (FIFA) Жаҳон чемпионати–2026да иштирок этган футболчилари учун «Барселона»га 2,8 миллион евро тўлаб беради. Бу ҳақда AS нашри хабар тарқатди.
Манбага кўра, каталония клуби бу сафар 2022 йилги жаҳон чемпионатига нисбатан камроқ маблағ олади. Ўшанда ФИФА «Барселона»га футболчиларининг мундиалдаги иштироки учун 4,4 миллион евро тўлаган эди.
Хабар қилинишича, барча клублар саралаш босқичида иштирок этган ҳар бир футболчи учун ҳар бир ўйин ҳисобидан 2362 АҚШ доллари (тахминан 2063 евро)дан олади. Бунда футболчи майдонга тушган ёки тушмаганининг аҳамияти йўқ.
Жаҳон чемпионатининг финал босқичида эса тўловлар янада юқори бўлади. FIFA миллий жамоалар йиғинининг биринчи кунидан тортиб, терма жамоанинг турнирдаги сўнгги ўйинидан кейинги кунгача ҳар бир футболчи учун кунига 4330 евро миқдорида маблағ ажратади.
