Файзуллаев россияликлар фикрини ўзгартирди
Россиялик спорт журналисти Александр Троицкий Аббосбек Файзуллаевнинг Россия футболидаги таъсирини алоҳида эътироф этди. Унинг таъкидлашича, ўзбекистонлик футболчи нафақат майдонда, балки маданий жиҳатдан ҳам муҳим ўрин тутади.
«Аббос Россияда ўзбек ва бутун Марказий Осиё футболига бўлган муносабатни ўзгартиришга катта ҳисса қўшди. У кўплаб москваликлар орасида йиллар давомида шаклланган стереотипларни йўққа чиқара олди. Бу жуда муҳим», — деб ёзади Троицкий ўзининг “Азия-Спорт” телеграм-каналида.
Журналист шунингдек, Файзуллаевнинг инсон сифатидаги фазилатларини — самимийлиги, очиқкўнгиллиги ва меҳмондўстлигини алоҳида қайд этди. Унинг клубдошларига таом қилган ўзбек палови ҳамон ёдда қолганини таъкидлаб, керак бўлса, «у клубга ўз фарзандидек қайтиши мумкин», деди.
Эслатиб ўтамиз, аввалроқ Файзуллаевнинг Туркиянинг “Истанбул Башакшехир” клубига ўтиши мумкинлиги ҳақида хабарлар пайдо бўлганди. У ерда ҳамюртимиз Элдор Шомуродов ҳам тўп суради.
