Эндрик қишки трансферлар ойнасида «Реал Мадрид»ни тарк этиши мумкин

Мадриднинг «Реал» клуби ҳужумчиси Эндрик қишки трансферлар вақтида жамоани тарк этишни режалаштирмоқда. Бу ҳақда Sky Sports нашри хабар берди.

Манбага кўра, 19 ёшли бразилиялик футболчи бош мураббий Хаби Алонсо режаларига киритилмаган ва жорий мавсумда ҳали бир дақиқа ҳам асосий жамоа сафида майдонга тушмаган.

Эндрик ўз ҳолатидан норози ва ижара асосида бошқа клубга ўтиш имкониятини кўриб чиқмоқда. «Реал» раҳбарияти ҳам футболчи фаолиятини Бундеслиганинг бирор жамоасида давом эттириш вариантини инкор қилмаяпти.

Маълумот учун, Эндрикнинг «Реал» билан тузган амалдаги шартномаси 2030 йилга қадар мўлжалланган. У ўтган мавсум барча турнирларда 37 та ўйинда майдонга тушиб, 7 та гол муаллифи бўлган.

Насрулло Каримов

Журналист