Элдор Шомуродов: Майдонда тўлиқ куч билан ўйнаш керак – сири шунда
«Рома» ва Ўзбекистон терма жамоаси ҳужумчиси Элдор Шомуродов Италия чемпионатининг «Фиорентина»га қарши ўйини олдидан Sky Sports ва DAZN телеканалларига қисқа интервю берди. Суҳбат давомида у жамоа услуби, Артём Довбик билан ҳамкорлик ва мураббий Клаудио Ранери билан иш ҳақида фикр билдирди.
«Рома»нинг ҳужумкор ўйини ҳақида:
«Ҳа, бундай ўйин менга ёқади. Биз ким майдонга тушишидан қатъи назар, ҳужумкор ўйнаймиз. Энг муҳими — ғалаба», — деди Элдор жамоа характерини таъкидлар экан.
Артём Довбик билан ҳамкорлик ҳақида:
«Икки марказий ҳужумчи билан ўйнаш рақибларни қўрқитадими?» деган саволга Элдор шундай жавоб берди: «Йўқ, биз хотиржаммиз. Довбик билан бир-биримизни яхши тушунамиз, кўп гаплашамиз. Қайси жамоага қарши ўйнашимиз муҳим эмас — биз тайёрмиз».
Клаудио Ранери ҳақида:
«Устоз — жуда ажойиб инсон. У нима талаб қилаётганини яхши тушунаман ва шуни амалга оширишга ҳаракат қиламан», — деди Шомуродов. DAZN телеканали мухбири «Ранерининг сири нима?» деб сўраганида, Элдор шундай жавоб қайтарди: «Сирни оча олмайман. Майдонда бор кучимизни беришимиз керак — сири айнан шунда».
Шомуродовнинг статистикаси:
Жорий мавсумда Элдор Шомуродов «Рома» сафида 21 ўйинда майдонга тушиб, 4 гол ва 3 голли пас билан ажралган.
