Бу қоидалар Диогу Жотани ҳаётда қолдириши мумкин эди
Қозоғистонлик автопойгачи Олег Хридочкин Sports24.kz нашрига берган интервьюсида “Ливерпул” ва Португалия терма жамоаси аъзоси Диогу Жотанинг ҳалокати юзасидан ўз фикрларини билдириб, ҳайдовчиларга ҳаётни сақлаб қолиш учун муҳим маслаҳатлар берди.
«Энг муҳими — хавфсизликка беэътибор бўлмаслик. Рулда туриб ҳар бир ҳаракат аҳамиятли. Ҳеч қачон хавфсизлик камарисиз ҳаракатланманг — ҳатто йўл бўш, манзил яқин бўлса ҳам. Тезликни чеклаш эркинлик эмас, масъулият масаласи.
Уларнинг Lamborghini каби юқори технологияли автомашинада юргани ҳам афсуски, ҳалокатнинг олдини ола олмади. Ҳатто бундай авто ҳам бепарволик олдида ожиз. Рул билан ўйнаш, машинанинг имкониятларини кўрсатишга уриниш — хавфли. Ҳаёт видеоуйин эмас — бу ерда “қайта бошлаш” тугмаси йўқ.
Рулга онгли ва ҳушёр ҳолда ўтириш керак. Бу нафақат сизнинг, балки атрофдагиларнинг ҳам ҳаётини белгилайди. Ушбу фожиа ҳаммамизга эслатма бўлсин: эътиборли бўлиш — танлов эмас, мажбурият. Ҳалок бўлганларга Аллоҳ раҳмат қилсин», — деди Хридочкин.
Marca нашри маълумотига кўра, фожиага шина портлаши сабаб бўлган. Ундан сўнг машина ёниб кетган ва Диогу Жота ҳамда унинг укаси Андре воқеа жойида ҳалок бўлишган.
«Агар шина қизиб кетган ёки шикастланган бўлса, у ҳар қандай пайтда портлаши мумкин. Биз трекда ҳар бир заҳматни техник кўрикдан бошлаймиз. Одатда йўлда бунга эътибор берилмайди — ва бу катта хато. Трекда сен миллисекундлар учун курашасан, йўлда эса — ҳаёт учун», — дея қўшимча қилди автопойгачи.
Эслатиб ўтамиз, ушбу ҳалокат 3 июл куни Испаниянинг Самора вилоятида содир бўлган.
