Боймирза Халилов: \"Жаҳон чемпионатида иштирок этишни ота-боболаримиз давридан бери ҳавас қилиб келин
Sports24.uz Ўзбекистондаги катта нашрлардан бири Kun.uz видео-оператори Боймирза Халиловнинг фикрлари билан ўртоқлашди:
"Эртанги ўйин зўр, ҳақиқий тарихий учрашув бўлади. Нимаси билан тарихий деганда, рақибнинг футболдан ташқарида бизникиларга атайин қилаётган қаршиликлари, Ўзбекистон терма жамоасини муддатидан аввал мундиал йўлланмасини қўлга киритмаслиги учун қўлларидан келганича ҳаракат қилаётганини кўриш мумкин. Буни футболдан ташқари сиёсат деса ҳам бўлади.
Ўйин ҳақида фикр билдирадиган бўлсам, худо хоҳласа бизникилар эртанги баҳсни ўзида Жаҳон чемпионати йўлланмасини қўлга киритишади деб ўйлаб турибман ва бунга ишончим комил. Ғалаба билан, йўқ деганда дуранг билан кўзланган натижага эришамиз.
Жаҳон чемпионатида иштирок этишни ота-боболаримиз давридан бери ҳавас қилиб келинади. Бу воқеани кўриш бизга насиб қилганга ўхшайди. Кейин эса, худди шу таркибни сақлаб, ривожлантириб бориш керак. Чунки, кейинги йили бўладиган мундиални ўзи билан қониқиб қолмаслигимиз керак. Тўрт йилликнинг энг катта турнирида доимий қатнашадиган терма жамоалар қаторига кириш учун ҳаракат қилишимиз керак. Бунинг учун жамоада яхши муҳитни яратиш, селекция ишларини янада кучайтириш, ўзаро рақобатбардошлик каби ишларини амалга ошириш керак бўлади.
Балким ҳозир ҳам бордир, балким йўқдир, лекин айни пайтда коррупцияни камайганлиги ҳисобига олдингига қараганда анча яхши натижа кўрсатиляпти. Мисол учун Абдуқодир Ҳусановнинг “Манчестер Сити”га борганлиги катта шов-шувга сабаб бўлди. Бу эса Ўзбекистонни яна бир бор дунё танишига сабабчи бўлди. Шомуродовнинг “Рома”даги ўйинлари яхшилана бошлади. Файзуллаев мана Россия кубоги соҳибига айланди. Футболчиларимиз юқори формада етиб келишган. Насиб қилса Жаҳон чемпионати йўлланмасини бешинчи июньда бўлиб ўтадиган ўйинда ҳал қилишади. Йигитларга омад тилаб қоламиз.
Жаҳон чемпионатига чиқиш мен учун жуда ҳам фахр. Оддий мисол, айрим хориж мамлакатларида Ўзбекистонни бошқа давлатлар билан адаштириб юборишади. Мундиал эса Ўзбекистонни яна бир бор дунё танишига сабабчи бўлади. Қолаверса, бу натижа футболчиларимиз ҳамда футболимиз келажаги учун ҳам жуда катта фойда бўлади. Чунки, Жаҳон чемпионатига катта скаутлар ташриф буюришади. Футболчиларимиз Европанинг катта клублари билан шартномалар имзолаши мумкин. Бу эса Top-5лик чемпионатида ўйнайдиган юртдошларимиз сони ошишига хизмат қилади"
