«Бенфика» Моуринью учун «Реал»дан анчагина пул ундириб олмоқчи
Жозе Моуриньюнинг Мадриднинг «Реал» клуби бош мураббийлигига тайинланиши «қироллик клуби»даги президентлик сайловлари сабаб кечикмоқда. Лиссабоннинг «Бенфика» клуби эса ушбу кечикишдан унумли фойдаланиб, португалиялик мутахассиснинг шартномасини муддатидан аввал бекор қилгани учун кўпроқ компенсация олмоқчи. Бу ҳақда AS нашри хабар бермоқда.
Гап шундаки, Моуриньюнинг амалдаги шартномасида алоҳида банд бор: у 26 майга қадар 7 миллион евро эвазига «Бенфика»ни тарк этиши мумкин. Агар бу муддат ўтиб кетса, мазкур банд ўз кучини йўқотади ва «Реал» компенсация миқдори бўйича Лиссабон клуби билан қайтадан, уларнинг шартлари асосида музокара олиб боришга мажбур бўлади.
Шуниси аниқки, «Реал» билан боғлиқ вазият қандай якунланишидан қатъи назар, Моуринью «Бенфика»да қолмайди. Унинг клуб билан 2027 йилгача шартномаси бўлса-да, португалиялик мутахассис кетишга қатъий қарор қилган.
