«Барселона» собиқ футболчиси фаолиятини БААда давом эттиради

Испаниялик вингер Кристиан Телло БААнинг иккинчи дивизионида иштирок этувчи «Палм Сити» жамоасига ўтди. Бу ҳақда клуб матбуот хизмати расман эълон қилди.

Манбага кўра, «Палм Сити» мамлакатнинг олий дивизионига чиқиш учун курашмоқда ва клуб раҳбарияти Теллонинг тажрибаси бу мақсадга эришишда ёрдам беради, деган умидда.

Маълумот учун, Телло «Барселона» ва «Эспаньол» академияларининг тарбияланувчиси бўлиб, профессионал фаолияти давомида «Порту», «Фиорентина», «Бетис», «Лос-Анжелес», шунингдек Саудиянинг «Ал Фотих» ва «Ал Уруба» клубларида ўйнаган.

Телло «Барселона» билан Испания чемпиони, мамлакат кубоги ва Суперкубоги соҳиби бўлган. «Бетис» сафида эса Испания кубогини ютган. «Лос-Анжелес» билан эса MLS чемпиони ва мавсум ғолиби бўлган.

Насрулло Каримов

Журналист