«Барселона» раҳбарияти Ҳанси Флик ўрнига янги мураббий топиб қўйди
«Барселона»да бош мураббий Ҳанси Фликнинг келажаги тобора ноаниқ бўлиб бормоқда. Бу ҳақда El Chiringuito нашри хабар берди.
Манбага кўра, немис мутахассиси мавсум якунида клубни тарк этиши эҳтимоли ҳамкорликни давом эттириш вариантидан юқори турибди. Жамоа натижалардаги беқарорлик Фликка катта босим ўтказмоқда, у эса баъзи танқидларни адолатсиз деб ҳисоблайди.
Вазиятни мураккаблаштираётган яна бир омил — мураббий билан айрим футболчилар ўртасидаги таранг муносабатлар. Хусусан, Ламин Ямал ва Роберт Левандовски билан юзага келган тушунмовчиликлар клуб ичидаги муҳитга таъсир қилмоқда.
Клуб президенти Жоан Лапорта ҳамда спорт директори Деко эса аллақачон эҳтимолий номзодларни кўздан кечира бошлаган. Асосий фаворит сифатида «ПСЖ» бош мураббийи Луис Энрике кўрилмоқда, бироқ парижликлар уни қўйиб юборишга ҳозирча тайёр эмас. Навбатдаги номзод — «Комо» билан олиб бораётган самарали фаолияти билан эътибор қозонаётган Сеск Фабрегас. Унга бўлган қизиқиш Каталонияда тобора ортиб бормоқда.
