«Барселона» президентилигига номзод: «Биз афсоналаримиз клубга яширинча эмас, балки муносиб тарзда қайтишига интриламиз»
«Барселона» президентилигига номзод Марк Сирия келаси йили бўлиб ўтадиган сайловларда ғолиб чиққан тақдирда, ҳужумчи Лионел Мессини клубга қайтариш учун барча имкониятларни ишга солишини маълум қилди.
«Биз афсоналаримиз клубга яширинча, тун ярмида қайтиши эмас, балки очиқ ва муносиб тарзда қайтишига интриламиз. Бунга эришиш учун қўлимиздан келган барча ишни қиламиз. Месси — бу клуб учун алмаштириб бўлмас шахс. У мустаҳкам қўллаб-қувватлаш тизими ва яхши ташкил этилган тузилма билан қайтиши керак. Месси ва “Барселона” ўртасидаги муносабатлар Майкл Жордан ва Nike ўртасидаги алоқаларга ўхшаши лозим. Бу фақат клубнинг тижорий ёки институционал доираси билан чекланмасдан, ҳомийлар ва ёш футболчиларни ривожлантиришни ҳам қамраб олиши керак. Клуб тарихи тўпурори билан биз жуда кўп ишларни амалга оширишимиз ва катта даромад топишимиз мумкин. Агар ҳозирги молиявий ҳолатдан чиқишни истасак, унинг уйига қайтиши ниҳоятда муҳим», — дея Сириянинг сўзларини келтиради ESPN.
Эслатиб ўтамиз, Лионел Месси 2000 йилдан 2021 йилгача каталон клуб тизимида фаолият юритган. Аргентиналик футболчи 778 та ўйинда 672 та гол уриб, «Барселона» тарихи тўпурори ҳисобланади. У каталонлар сафида тўп сурган даврида етти бор “Олтин тўп”ни қўлга киритган.
