«Барселона» «Эль Класико» можаросидан кейин Ямалнинг баъзи оммавий тадбирларини бекор қилди
«Барселона» раҳбарияти 18 ёшли ҳужумчи Ламин Ямалнинг фаолиятини янада синчиклаб назорат қилишга қарор қилди. Бу ҳақда Sport.es нашри хабар бермоқда.
Манбага кўра, клуб «Эль Класико» олдидан Ямал атрофида пайдо бўлган ортиқча шов-шув сабаб унга футболга алоқадор бўлмаган тадбирларда иштирок этмасликни маслаҳат берган. Жумладан, футболчига янги мобил телефонлар сериясининг тақдимот маросимига боришни бекор қилиш тавсия этилган ва Ямал бу тавсияни тўлиқ қўллаб-қувватлаган.
Шунингдек, ўтган ҳафта Ямал француз стримери AmineMaTue билан видеороликда иштирок этган. Бироқ «Барселона» раҳбарияти ушбу видео оммага тақдим этилмаслигини, шунингдек, душанбага режалаштирилган интервьюнинг ҳам бекор қилинишига интилаяпти.
Эслатиб ўтамиз, «Эль Класико» арафасида Ямал «Kings League»даги «Porsinos» жамоаси «Реал»ни эслатадими, деган саволга қуйидагича жавоб берганди:
«Ҳа, албатта. Улар доимо шикоят қилишади ва қоидаларни бузишади».
