«Барселона» ЕЧЛ’нинг кейинги мавсумида очколардан маҳрум қилиниши мумкин
Каталониянинг «Барселона» клуби молиявий қоидаларни бузгани учун Чемпионлар Лигасининг кейинги мавсумида УЕФА санкцияларига дучор бўлиши мумкин. Бу ҳақда The Times нашри хабар бермоқда.
Манбага кўра, «кўк-анорранглилар» номоддий активларни сотишдан тушган даромадни нотўғри ҳисоблаб, Европа футболи қоидаларини бузишда давом этмоқда.
2024 йил кузида «Барселона» бундай қоидабузарликлар учун 500 минг евро миқдорида жаримага тортилган эди. Клуб бу қарор устида Спорт арбитраж судига (CAS) шикоят қилган, бироқ апелляция рад этилган.
Молиявий фейр-плей қоидаларини яна бузган тақдирда, «Барселона» кейинги мавсумда Чемпионлар Лигасининг умумий босқичида бир неча очкодан маҳрум қилиниши, шунингдек, турнирдаги иштироки учун таркибининг бир қисмини йўқотиши мумкин.
Маълумот учун, «Барселона» ўтган мавсум Испания чемпиони бўлган, шунингдек, мамлакат Кубоги ва Суперкубогига ҳам эга чиққан.
