«Барселона» 17 ёшли мисрлик ҳужумчига қизиқиш билдирмоқда

«Барселона» Миср ёшлар терма жамоаси ҳамда Қоҳиранинг «Ал Ахли» клуби марказий ҳужумчиси Ҳамза Абдулкаримга қизиқиш билдирмоқда. Бу ҳақда журналист Фабрицио Романо X ижтимоий тармоғидаги саҳифасида маълум қилди.

Италиялик журналист 17 ёшли форвардни иқтидорли футболчи сифатида таърифлаб, унинг келажаги бўйича дастлабки музокаралар ноябр ойида бўлиб ўтганини таъкидлади.

Шу билан бирга, ҳозирча Абдулкаримнинг «кўк-анорранглилар» сафига эҳтимолий трансфери бўйича келишувга эришилмаган, аммо футболчи кузатув остида қолмоқда.

Жорий мавсумда Абдулкарим барча турнирларда 2 та учрашувда майдонга тушган, бироқ гол ёки ассист қайд этмаган. Transfermarkt маълумотларига кўра, футболчининг бозор қиймати 100 минг еврони ташкил этади.

Насрулло Каримов

Журналист