БАА cпорт вазирлиги Ўзбекистонга қарши ўйин учун чипталарни бепул тарқатмоқда
БААда Ўзбекистон терма жамоасига қарши муҳим учрашув олдидан тайёргарлик якунига етиб бормоқда. Эртага, 5 июн куни бўлиб ўтадиган ҳал қилувчи баҳс учун стадион тўлиқ тайёр ҳолатга келтирилган.
ОАВ маълумотларига кўра, БАА Спорт вазирлиги терма жамоани қўллаб-қувватлаш мақсадида махсус ташаббусни бошлаган. Турли спорт турлари вакиллари футболчиларга мурожаат йўллаб, қисқа видеолар орқали ғалаба тилашмоқда.
Бундан ташқари, турли спортчиларга ўйин учун бепул чипталар ҳам тарқатилаяпти. Мамлакат футбол расмийлари жамоани руҳлантиришга ҳаракат қилмоқда ва фуқароларни терма жамоани қўллаб-қувватлашга чақирмоқда.
Шу билан бирга, БАА томонидан ўзбек мухлислари ва журналистларига босим ўтказилаётгани ҳам қайд этилмоқда. Аввалроқ Шаржа аэропортида ўзбекистонлик мухлислар ва ОАВ вакиллари тушунтиришларсиз тўхтатиб қолингани ҳақида хабарлар тарқалган эди.
