Артета: «Нима сабабдан пенальти белгиланганига ҳамон тушунмаяпман»
«Арсенал» бош мураббийи Микель Артета «Сандерленд»га қарши учрашувдан кейин ўз фикрларини билдирди.
«Аввало, биз муҳокама қилишимиз керак бўлган биринчи масала — бу даражада бундай ҳолатни қабул қилиб бўлмайди. Бу жуда чиройли футбол ўйини бўлди. Икки жамоа ҳам юқори савияда ҳаракат қилди, стадиондаги муҳит эса ақл бовар қилмас даражада эди. “Сандерленд” жуда тартибли жамоа, улар ўйиннинг кўплаб жиҳатларида жуда яхши ҳаракат қилишади.
Таркибида кучли футболчилар бор ва улар бизга жуда кўп муаммолар туғдиришди. Биз буларнинг барчасига қарши туришимиз керак эди. Бу жуда оғир ҳафта бўлди — аввал “Челси”, кейин “Наполи”га қарши ўйин ўтказдик. Устига-устак, бугунги учрашувда юз берган ҳолатга дуч келдик. Менинг фикримча, бу мутлақо қабул қилиб бўлмайди.
Мен ушбу эпизодни 20 марта кўрдим ва улар қандай қилиб бундай вазиятда пенальти белгилашга қарор қилганини тушуна олмаяпман. VAR нима сабабдан аралашганини ҳам тушуниш қийин.
Ростини айтсам, нима деб ўйлашни билмайман. Аммо шундай чиройли футбол ўйинидан кейин биз шу даражада жиддий таъсирга эга бўлган қарорни муҳокама қилишга мажбур бўлаётганимиздан хафаман. Чунки бундай қарор мавсум тақдирини ўзгартириши ва чемпионликка қимматга тушиши мумкин. Биз бу даражага етиш учун жуда кўп меҳнат қиляпмиз. Шунинг учун бундай нарса содир бўлмаслиги керак. Мен бу қарорга ҳеч қандай тушунтириш топа олмаяпман. Шу сабабли ҳозир бунинг изоҳини топишга ҳаракат қиламан», — деди Артета.
