Арбелоа: «Мавсум биз кутганидек кечмади»
Мадриднинг «Реал» клуби бош мураббийи Альваро Арбелоа Испания чемпионати 37-турида «Севилья» устидан қозонилган минимал (1:0) ғалабадан сўнг Килиан Мбаппе ва Винисиус Жуниорнинг ўйини ҳақида фикр билдирди.
«Мен бутун жамоанинг муносабати ва футболчиларнинг майдонда ўзини қандай кўрсатганидан мамнунман. Албатта, мавсум биз кутганидек кечмади. Аммо мен жамоа билан ишлаётган тўрт ой давомида ҳам Килиан, ҳам Винисиус барча қийинчиликларга қарамай, доим максимал даражада ҳаракат қилди.
Мен учун бу шундай футболчиларки, дунёдаги ҳар қандай клуб уларни таркибида кўришни истайди. Агар имконият бўлса, улар учун катта навбат ҳосил бўлиши аниқ. Улар жаҳон футболидаги энг хавфли ва кутилмаган ўйин кўрсата оладиган беш нафар футболчидан иккитасидир.
Бугун Винисиус гол урди, аммо Мбаппе ҳам жамоа учун жуда катта ҳажмда иш бажарди. Умид қиламанки, кейинги ўйинда омад унга ҳам кулиб боқади», — деди Арбелоа ўйиндан кейинги матбуот анжуманида.
Айни пайтда «Реал» Испания чемпионатида иккинчи ўринда бормоқда.
