Анчелотти Моуриньюнинг «Реал»га қайтиши мумкинлигига муносабат билдирди
Бразилия терма жамоаси бош мураббийи Карло Анчелотти португалиялик мутахассис Жозе Моуриньюнинг келаси мавсумда мадриднинг «Реал» клубига қайтиши мумкинлиги ҳақидаги хабарларга муносабат билдирди.
«Агар у “Реал”га қайтса, мен бунинг учун чин дилдан хурсанд бўламан. Моуринью илгари ишлаган клубларида қандай иш олиб борган бўлса, бу вазифани ҳам уддалай олади. Ҳозир “Реал”га қайта қуриш ва авлодлар алмашинуви керак.
Сўнгги йилларда клуб Каземиро, Тони Кроос, Лука Модрич ва Карим Бензема каби муҳим футболчиларни йўқотди. Жамоа ичидаги муҳит жуда катта аҳамиятга эга — уни кучли характер, ёрқин шахсият ва лидерлик фазилатларига эга ўйинчилар шакллантиради.
Шунинг учун “Реал”га аввалги муваффақиятларни олиб келган муҳитни қайта тиклаш учун вақт керак бўлади. Муаммо фақат футболчиларнинг техник савиясида эмас — натижага эришиш учун тўғри мувозанатни ҳам шакллантириш лозим», — деди Анчелотти The Athletic нашрига берган интервьюсида.
Эслатиб ўтамиз, Жозе Моуринью 2010–2013 йилларда «Реал»ни бошқарган. У мадридликлар билан Испания чемпионати, шунингдек мамлакат Кубоги ва Суперкубогини қўлга киритган. Ҳозирда мутахассис Лиссабоннинг «Бенфика» клубида фаолият юритмоқда ва ОАВ маълумотларига кўра, клуб уни «Реал»га қўйиб юборишга розилик берган.
Карло Анчелотти эса «қаймоқранглилар»ни 2013–2015 ҳамда 2021–2025 йилларда бошқарган эди.
