Аббосбек Файзуллаев ўз ўйинига паст баҳо берди
Ўзбекистон миллий терма жамоаси ва Москвадаги ССКА клуби ярим ҳимоячиси Аббосбек Файзуллаев “армигачилар”нинг Россия Кубоги Суперфиналидаги ғалабаси ҳақида фикр билдирди.
“Бу менинг Россиядаги биринчи совриним бўлгани учун ҳам аҳамияти жуда катта. Ғалаба йўлида кўп нарсани енгиб ўтдик, жуда оғир ўйинлар бўлди, айниқса, “Зенит”га қарши баҳс. Ушбу беллашувда биз пенальтилар сериясида зафар қучдик. Биз бу кубокқа муносибмиз, деб ўйлайман.
Бу мавсумни шахсан ўзим ўтган йилга қараганда ёмонроқ баҳолайман. Аввалги мавсум самарадорлик бўйича 5+14 кўрсаткич қайд этгандим. Бу гал эса бу кўрсаткич 3+8 кўринишида бўлди.
Мавсумнинг иккинчи қисмида майдондаги позициям ўзгарди ва бунинг натижасида ўйинимда пасайиш кузатилди. Ўзгариш ўз таъсирини кўрсатди. Мавсум жуда яхши бошланганда, кейин ўрним ўзгарди.
Натижада статистик кўрсаткичлар аввалгидек бўлмади, лекин мен янги позицияга кўникиб олишга ҳаракат қилдим”, – дейди Файзуллаев.
Эслатиб ўтамиз, ССКА Россия Кубоги Суперфиналида “Ростов”га қарши баҳс юритди. Асосий вақт дуранг билан якунлангач, ғолиб пенальтилар сериясида аниқланди. Унда омад “армигачилар”га кулиб боқди (4:3).
