Аббосбек Файзуллаев йилнинг энг катта ютуғини айтди
Москва ЦСКАси ва Ўзбекистон миллий терма жамоаси яримҳимоячиси Аббосбек Файзуллаев сўнгги бир йил ичидаги энг ёрқин ютуқлари ҳақида фикр билдирди. Унинг таъкидлашича, жаҳон чемпионати йўлланмасини қўлга киритиш шахсий ва мамлакат футболи тарихидаги энг муҳим воқеалардан биридир.
— Миллий жамоа билан жаҳон чемпионатига йўлланма олиш — бу мен учун орзу ва улкан фахр. Бу фақат мен учун эмас, бутун халқимиз учун муҳим воқеа, — деди Файзуллаев.
Шу билан бирга, у ЦСКА билан қўлга киритган икки трофей — Россия Кубоги ва Суперкубоги ҳам алоҳида аҳамиятга эга эканини қайд этди.
— Бу ютуқларни солиштирмайман, чунки ҳар бири ўзига хос қадрга эга. Терма жамоа билан эришилган муваффақият — тарихий, ЦСКАдаги трофейлар эса мен ва оилам учун ғурур манбаидир, — дея қўшимча қилди футболчи.
Эслатиб ўтамиз, 12 июл куни Қозон шаҳрида бўлиб ўтган OLIMPBET Россия Суперкубоги финалида ЦСКА “Краснодар” устидан 1:0 ҳисобида ғалаба қозонганди. Беллашувдаги ягона голни 48-дақиқада Игор Дивеев киритган. Бу Файзуллаев учун мавсумдаги иккинчи трофей ҳисобланади — 1 июн куни у жамоаси билан Россия Кубогини ҳам қўлга киритганди.
