Abbosbek Fayzullayev yilning eng katta yutug'ini aytdi
Moskva CSKAsi va O‘zbekiston milliy terma jamoasi yarimhimoyachisi Abbosbek Fayzullayev so‘nggi bir yil ichidagi eng yorqin yutuqlari haqida fikr bildirdi. Uning ta'kidlashicha, jahon chempionati yo‘llanmasini qo‘lga kiritish shaxsiy va mamlakat futboli tarixidagi eng muhim voqealardan biridir.
— Milliy jamoa bilan jahon chempionatiga yo‘llanma olish — bu men uchun orzu va ulkan faxr. Bu faqat men uchun emas, butun xalqimiz uchun muhim voqea, — dedi Fayzullayev.
Shu bilan birga, u CSKA bilan qo‘lga kiritgan ikki trofey — Rossiya Kubogi va Superkubogi ham alohida ahamiyatga ega ekanini qayd etdi.
— Bu yutuqlarni solishtirmayman, chunki har biri o‘ziga xos qadriyatga ega. Terma jamoa bilan erishilgan muvaffaqiyat — tarixiy, CSKAdagi trofeylar esa men va oilam uchun g‘urur manbaidir, — deya qo‘shimcha qildi futbolchi.
Eslatib o‘tamiz, 12 iyul kuni Qozon shahrida bo‘lib o‘tgan OLIMPBET Rossiya Superkubogi finalida CSKA “Krasnodar” ustidan 1:0 hisobida g‘alaba qozongandi. Bellashuvdagi yagona golni 48-daqiqada Igor Diveyev kiritgan. Bu Fayzullayev uchun mavsumdagi ikkinchi trofey hisoblanadi — 1 iyun kuni u jamoasi bilan Rossiya Kubogini ham qo‘lga kiritgandi.
