23 йиллик танаффусдан сўнг: аёллар терма жамоамиз Осиё Кубоги финалига йўлланма олди
Ўзбекистон аёллар терма жамоаси футбол бўйича 23 йилдан кейин илк бор Осиё Кубогининг финал босқичига йўлланма олди. Катта ютуқка Катрина Кулбите бошчилигидаги жамоа эришди. Бу ҳақда Миллий олимпия қўмитаси матбуот хизмати хабар берди.
2026 йилда Австралияда бўлиб ўтадиган мусобақанинг финал босқичига чиқиш учун жамоамиз ҳал қилувчи баҳсда Непал термасини мағлуб этди. Тошкентдаги учрашув асосий вақтда 3:3 ҳисоби билан якунланди. Ғолиб пенальтилар сериясида аниқланди — футболчи қизларимиз 4:2 ҳисобида зафар қучишди ва тарихий йўлланмани қўлга киритишди.
Беллашувдан сўнг терма жамоа бош мураббийи Котрина Кулбите ўйин ҳақида қуйидагиларни айтди:
«Ўйинни жуда яхши бошладик ва ўз ўйинимизни кўрсата олдик. Аммо кейин қизил карточка олдик. Шундан сўнг, аниқ айтиш мумкин — ўйин биз учун тугаган эди. Ростини айтсам, жамоамнинг ўйинидан қониқмадим. Бу охирги вақтлардаги энг ёмон иккинчи бўлим бўлди. Шундай бўлса-да, биз йўлланмани қўлга киритдик — бу аёллар футболи учун катта натижа», — дея унинг сўзларини келтиради Championat.Asia.
Мураббий, шунингдек, келгуси Осиё Кубогига тайёргарлик ҳақида ҳам фикр билдирди:
«Бу масалани раҳбарият билан муҳокама қилдик. Бугун эса бу тарихий натижани нишонлаш керак. Бу жуда ҳис-туйғуларга бой кун бўлди. Март ойигача ҳам расмий, ҳам норасмий йиғинлар ташкил этамиз. Товаришлик учрашувлари ва кичик турнирларда иштирок этиш режада бор. Миллий лига ноябрда якунланади, шу боис мартгача тайёргарликни тўғри ташкил этиш муҳим. Умид қиламан, Ўзбекистон футбол ассоциацияси бизга барча шарт-шароитларни яратиб беради».
Эслатиб ўтамиз, 6 июль куни Тошкент шаҳрида аёллар терма жамоалари ўртасидаги Осиё Кубоги саралаш турнири якунланди. Унда ғолиблар мусобақанинг финал босқичига чиқиш ҳуқуқини қўлга киритишди.
