«Реал» Ян Диомандега ортиқча пул тўлади, аммо ёш вингер Моуриньо тизимига жуда мос тушади
2026 йилги ёзги трансфер ойнаси яна катта келишувлар билан ёдда қолмоқда. Мавсум якунлангач, клублар таркибни кучайтириш учун бозорга фаол киришди. 1-сентябр куни ёпиладиган трансфер ойнасида бир қатор йирик номлар янги жамоаларга ўтмоқда.
Ян Диомандe — «RB Лейпциг»дан “Реал Мадрид”га, 140 миллион евро
Ушбу трансфер «RB Лейпциг» учун нима англатади?
Бир йил аввал 20 миллион еврога сотиб олинган футболчидан 120 миллион евро фойда қилиш «RB Лейпциг» учун ажойиб бизнес бўлди. Аввалроқ Бенжамин Шешко, Йошко Гвардиол, Доминик Собослаи ва Дани Олмо каби футболчилар ҳам «Ред Булл Арена»да ўсиб, кейинчалик катта клубларга йўл олган эди. Диомандe эса бу рўйхатдаги энг катта муваффақиятлардан бирига айланиши мумкин.
Шу билан бирга, «Лейпциг» учун уни алмаштириш жуда қийин бўлади. Диомандe ўтган мавсумда клубнинг Бундеслигада учинчи ўринни эгаллашида асосий кучлардан бири бўлди. У ярим ҳимоячи Кристоф Баумгартнер билан деярли идеал даражада ўзаро тушуниш ҳосил қилганди. Унинг тезкор дриблинги, аниқ зарбалари ва олдинга йўналтирилган пасларисиз «Лейпциг» Чемпионлар Лигаси зонасига қайтишда қийналиши мумкин.
Шунга қарамай, немис клуби ўз етакчиларини қиммат нархда сотишга ўрганиб қолган. Клубнинг трансфер модели ҳам айнан шунга асосланган. «Лейпциг» тез орада яна янги истеъдод топиши мумкин. Агар Диомандe «Реал»да дарҳол ўзини кўрсата олса, бу немис клубининг иқтидорларни топиш борасидаги обрўсини янада оширади.
Диомандe «Реал Мадрид» учун қанчалик фойдали?
«Реал» Диомандe учун ортиқча пул тўлагандек кўринади. Аммо бугунги трансфер бозорида асосий мақсадга эришиш учун кўпинча шундай йўл тутишга тўғри келади.
Мадрид клубига қанотларда қўшимча вариант жуда зарур эди. Родриго тизза олд хочсимон бойлами жарроҳлигидан тикланишда давом этмоқда ва 2027 йилгача сафга қайтмаслиги кутилмоқда. Диомандe эса ҳар икки қанотда ҳам ўйнай олади.
Баъзи тахминларга кўра, «Реал» Диомандени Винисиус Жуниорнинг ўрнини эгаллаш учун олган бўлиши мумкин, чунки бразилиялик футболчига «Арсенал» жиддий қизиқмоқда. Бироқ Диомандe ўтган мавсум «Лейпциг» сафидаги 36 та ўйинининг аксарият қисмида ўнг қанотда ҳаракат қилган.
У ҳужумга фаол қўшиладиган Трент Александр-Арнолд учун идеал шерик бўлиши мумкин. Диомандe Жозе Моуриньонинг 4-2-3-1 тизимига ҳам жуда мос тушади. Унда ҳимояни ёриб кириш учун тезлик ва чаққонлик, тўпни қайтариб олиш учун эса куч ва прессинг бор.
Диомандe ҳали тажрибасиз футболчи, аммо тез ўрганиш қобилиятига эга. Унинг Ла Лига муҳитини билиши ҳам мослашув жараёнини енгиллаштиради. ПСЖ ва «Ливерпуль» каби клубларни ортда қолдириб, Диомандени қўлга киритиш «Реал» икки мавсум совринсиз қолганига қарамай, ҳамон дунёдаги энг катта клуб эканини кўрсатади.
19 ёшли иқтидор бу ютуққа қандай эришди ва уни олдинда нима кутади?
Бу Диомандe учун орзудаги трансфер бўлди. Бир йил аввал кўпчилик мухлислар уни деярли танимасди. У Ла Лигада тушиб кетган «Леганес»дан «Лейпциг»га 20 миллион евро эвазига ўтган эди.
Диомандe «Леганес»даги ягона мавсумида атиги 10 та лига ўйинида майдонга тушган, аввал эса захира жамоада ўйнаган. Аммо «Лейпциг» унинг улкан салоҳиятига ишонди ва бу қарор тезда ўзини оқлади.
У профессионал фаолиятидаги илк тўлиқ мавсумидаёқ барча мусобақаларда 23 та самарали ҳаракат қайд этди. Кейин Жаҳон чемпионатига чақирилди ва Кот-д’Ивуар терма жамоаси билан 1/16 финалгача етиб борди.
19 ёшли футболчи қисқа вақт ичида Европанинг бир қатор гранд клублари эътиборига тушди. Бироқ «Реал Мадрид»дан таклиф келишини унинг ўзи ҳам кутмаган бўлса керак. Энди у «Сантьяго Бернабеу»даги босим ва 140 миллион евролик нарх билан курашиши керак бўлади. Аммо қандай бўлмасин, унинг бу даражага етиб келгани ўзи аллақачон катта ютуқ бўлиб улгурди.
