Месси тарихининг энг ноёб 5 та меморабилиа буюмлари: 49 минг долларлик чиптадан 7,8 миллион долларлик либосларгача
Месси тарихининг энг ноёб 5 та меморабилиа буюмлари: 49 минг долларлик чиптадан 7,8 миллион долларлик либосларгача
Лионел Месси фаолияти давомида нафақат рекордлар ўрнатди, балки футбол тарихининг энг қимматбаҳо коллекцион буюмларига айланган кўплаб экспонатларни ҳам қолдирди. sports24.uz аргентиналик афсонага тегишли бўлган, аукционларда сотилган энг ноёб буюмларни бештасини жамлади.
Лионел Месси ўзининг афсонавий фаолияти давомида футбол тарихидаги энг ёрқин саҳифаларни яратди. Унинг рекордлари, совринлари ва тарихий ўйинлари миллионлаб мухлислар хотирасида муҳрланиб қолган.
Бироқ Месси меросини нафақат статистикалар ёки кубоклар орқали, балки унинг фаолиятидаги муҳим воқеалар билан боғлиқ коллекцион буюмлар орқали ҳам кузатиш мумкин. Месси имзоси туширилган карточкалар ва формалар, тарихий учрашувларда кийилган либослар ҳамда ҳатто унинг «Барселона»га келишини таъминлаган машҳур салфетка ҳам катта қийматга эга.
Қуйида Месси фаолиятига оид аукционларда сотилган энг ноёб ва қимматбаҳо беш буюм билан танишамиз.
5. «Порту»га қарши дебют учрашуви чиптаси — 49 200 доллар
2003-йил 16-ноябрь куни Португалиянинг Порту шаҳридаги «Эстадио до Драгао» стадионига ташриф буюрган мухлислар ўша куни футбол тарихидаги муҳим воқеалардан бирига гувоҳ бўлаётганини билишмаган.
Улар янги стадион очилиши муносабати билан ўтказилган оддий ўртоқлик учрашувини томоша қилиш учун келишганди. Аммо ўша баҳсда «Барселона» сафида атиги 16 ёшли Лионел Месси илк бор асосий жамоа даражасида майдонга тушди.
Месси иккинчи бўлимда захирадан майдонга тушиб, келажакда қандай футболчига айланишидан дастлабки даракларни намойиш этди. «Барселона» ўша куни «Порту»га 0:2 ҳисобида мағлуб бўлди, бироқ учрашув чиптасини сақлаб қолган мухлислар йиллар ўтиб катта қийматли тарихий буюмга эга бўлиб қолишди.
«Cоллеcторс Тоолс» маълумотларига кўра, Месси дебютига оид жами 229 та тўлиқ чипта ва чипта қолдиғи баҳоланган. ПСА томонидан берилган энг юқори баҳо 8 бўлган.
ПСА 7 даражасидаги тўлиқ чипта эса Голдин аукционида 49 200 долларга сотилган.
4. 2017-йилги «Ремонтада»да кийилган форма — 200–400 минг доллар
2017-йил 8-март куни «Барселона» ва ПСЖ ўртасидаги Чемпионлар лигаси жавоб учрашуви футбол тарихидаги энг машҳур камбеклардан бирига айланди.
Парижда 0:4 ҳисобида мағлуб бўлган «Барселона» жавоб баҳсида 6:1 ҳисобида ғалаба қозониб, чоракфинал йўлланмасини қўлга киритди. Лионел Месси ўша учрашувда жамоасининг тўртинчи голини урди.
Месси ўша тарихий кечада кийган формаси кейинчалик «Сотҳебйъс» аукционига қўйилди. ПСА томонидан фотоматчинг орқали ушбу форма айнан ўша учрашувда Месси томонидан кийилгани тасдиқланган.
Мазкур буюмнинг тахминий қиймати 200–400 минг доллар атрофида баҳоланган.
3. Пеле рекордини янгилаган Месси бутсаси — 169 минг доллар
Лионел Месси 2020-йил 22-декабрь куни «Барселона» сафида «Реал Валядолид»га қарши учрашувда гол уриб, битта клуб сафида урилган голлар сони бўйича Пеле рекордини янгилади.
Бу Месси учун 644-гол бўлиб, бразилиялик афсонанинг «Сантос» сафидаги 643 та голлик натижасидан ўтишга имкон берди.
Тарихий гол урилган бутсалар Месси томонидан хайрия мақсадида тақдим этилди ва «Чристиеъс» аукционига қўйилди. Унда футболчининг рафиқаси ҳамда фарзандларининг исмлари акс этган.
Матч-wорн, яъни расмий учрашувда кийилган бутсалар табиий равишда фойдаланиш изларига эга эди. Шунга қарамай, улар футбол тарихидаги энг муҳим рекордлардан бирининг бевосита гувоҳи бўлгани сабабли ниҳоятда қимматли ҳисобланади.
Мазкур бутсалар 169 минг долларга сотилган.
2. «Барселона» билан шартнома тузилган машҳур салфетка — 964 450 доллар
Лионел Месси ва «Барселона» тарихидаги энг машҳур ҳикоялардан бири айнан шу кичик салфетка билан боғлиқ.
2000-йилда ўша пайтдаги «Барселона» спорт директори Карлес Рехач 13 ёшли аргентиналик футболчини клубга олиб келишга қарор қилади. Месси оиласининг клуб билан боғлиқ айрим хавотирлари бўлганига қарамай, томонлар келишувга эришади.
Аммо шартнома оддий қоғозда эмас, тушлик вақтида салфеткага ёзиб қўйилади.
Унда Рехач Месси билан шартнома имзолаш мажбуриятини ўз зиммасига олгани қайд этилган. Ўша пайтда бу кичик қоғоз парчаси келажакда футбол тарихидаги энг қимматбаҳо буюмлардан бирига айланишини ҳеч ким тасаввур қила олмаган.
2024-йилда машҳур салфетка аукционда 964 450 долларга сотилди.
У Месси томонидан имзоланмаган бўлса-да, бу буюм унинг «Барселона»даги афсонавий фаолиятига йўл очган тарихий келишувнинг амалдаги далили ҳисобланади.
1. 2022-йилги Жаҳон чемпионатида кийилган олти форма — 7,8 миллион доллар
Мессининг фаолиятидаги энг муҳим воқеа, шубҳасиз, 2022-йилги Жаҳон чемпионатидаги ғалаба бўлди.
Қатардаги турнир давомида аргентиналик юлдуз бир қатор тарихий ўйинларда майдонга тушди. Мексикага қарши урилган гол, Нидерландияга қарши драматик чоракфинал, шунингдек, Францияга қарши афсонавий финал — буларнинг барчаси Месси фаолиятининг энг ёрқин саҳифаларига айланди.
2023-йилда «Сотҳебйъс» аукционига Мессининг Аргентина миллий жамоаси сафида 2022-йилги Жаҳон чемпионати давомида кийган олтита формаси биргаликда қўйилди.
Тўпламга турнирнинг турли босқичларида кийилган либослар, жумладан, Францияга қарши финал учрашувининг биринчи бўлимида кийилган форма ҳам киритилган.
Мазкур коллекция 7,8 миллион долларга сотилди.
Бу сумма Мессининг меморабилиа буюмлари орасида энг юқори нархлардан бири бўлиб, тўпламнинг тарихий аҳамияти уни оддий коллекцион буюмдан анча юқорига олиб чиқади.
Месси меросининг нархи
Месси футбол майдонида ўрнатган рекордлар ва қўлга киритган совринлардан ташқари, унинг фаолиятига оид оддий кўринган буюмлар ҳам йиллар ўтиши билан улкан қийматга эга бўлмоқда.
49 минг долларлик дебют чиптаси, 964 минг долларлик салфетка ёки 7,8 миллион долларлик Жаҳон чемпионати формалари — буларнинг барчаси Лионел Месси футбол тарихида қанчалик катта из қолдирганини кўрсатади.
Айниқса, 2022-йилги Жаҳон чемпионатида кийилган олтита форма Месси фаолиятининг энг муҳим чўққисини ифодалаши билан алоҳида аҳамиятга эга.
Сизнингча Месси яна қайси жиҳатларти билан тарихда қолди? Фикрингизни изоҳларда қолдиринг.
