Таниқли россиялик блогер украинецга қарши жангдан сўнг Баҳодир Жалоловни танқид қилди
Бокс мавзусида ёзишга ихтисослашган россиялик блогер ўзининг телеграм-канали — MMA & Boxing орқали Баҳодир Жалоловнинг 5 апрел куни бўлиб ўтган жангидан олинган таассуротлари билан бўлишди. Унга кўра, икки карра олимпия чемпиони ҳали ҳам профессионалга хос ўйин кўрсата олмаяпти.
«Баҳодир Жалоловнинг жангини кўрдим — даҳшат! Ҳали ҳам айнан ҳаваскорча услуб: рингда айланиб юради, масофадан туриб комбинациялар ва секин зарбалар беради. Охирида эса рақибининг елкасига осилиб, жангни шундай якунлади. Шуниси ҳам борки, украин боксчисини жангга бир кун қолганда олиб келишди — у акклиматизациядан ҳам ўта олмаган, шунда ҳам олимпия чемпионини анча терлатди. Жалолов сакрамади, ҳаракат қилмади — фақат босим ўтказди, холос».
Блогер Матвеев рақибнинг параметрларига ҳам эътибор қаратган: 135 килограмм вазн, бўйи — 190 сантиметр. Эслатиб ўтамиз, 5 апрел куни Баҳодир Жалолов украин боксчиси Игорь Шевазовскийга қарши жанг ўтказди. 10 раунд давом этган жанг якунида ўзбекистонлик боксчи ҳакамлар қарорга кўра ғалаба қозонди.