Taniqli rossiyalik bloger ukrainetsga qarshi jangdan so'ng Bahodir Jalolovni tanqid qildi
Boks mavzusida yozishga ixtisoslashgan rossiyalik bloger o'zining telegram-kanali — MMA & Boxing orqali Bahodir Jalolovning 5 aprel kuni bo'lib o'tgan jangidan olingan taassurotlari bilan bo'lishdi. Unga ko'ra, ikki karra olimpiya chempioni hali ham professionallarga xos o'yin ko'rsata olmayapti.
«Bahodir Jalolovning jangini ko'rdim — dahshat! Hali ham aynan havaskorcha uslub: ringda aylanib yuradi, masofadan turib kombinatsiyalar va sekin zarbalar beradi. Oxirida esa raqibining yelkasiga osilib, jangni shunday yakunladi. Shunisi ham borki, ukrain bokschisini jangga bir kun qolganda olib kelishdi — u akklimatizatsiyadan ham o'ta olmagan, shunda ham olimpiya chempionini ancha terlatdi. Jalolov sakramadi, harakat qilmadi — faqat bosim o'tkazdi, xolos».
Bloger Matveev raqibning parametrlariga ham e'tibor qaratgan: 135 kilogramm vazn, bo'yi — 190 santimetr. Eslatib o'tamiz, 5 aprel kuni Bahodir Jalolov ukrain bokschisi Igor Shevazovskiyga qarshi jang o'tkazdi. 10 raund davom etgan jang yakunida o'zbekistonlik bokschi hakamlar qarorga ko'ra g'alaba qozondi.
