Парижда ҳаётини сақлаб қолган инсон билан учрашув
Ўзбекистон бокс терма жамоаси бош мураббийи Тулқин Қиличев Буюк Британия жамоаси билан қўшма йиғин чоғида физиотерапевт Робби Лиллис билан кўришди. У 2024 йил Париж Олимпиадасида юрак хуружи пайтида мураббийга шошилинч ёрдам кўрсатган эди.
Ўша вақтда Қиличев шогирди Ҳасанбой Дўсматовнинг ғалабасини нишонлар экан, ўзини ёмон ҳис қилган. Британиялик мутахассислар унга ёрдамга шошилишди: шифокор Хардж Сингҳ сунъий нафас берди, Робби Лиллис эса дефибриллятордан фойдаланди.
Қиличев Instagram саҳифасида Лиллис билан тушган суратини қўйиб, шундай ёзди:
«Жаноб Робби Лиллис — менинг ҳаётимни сақлаб қолган инсон. Уни яна кўрганимдан жуда хурсандман».
Ўзбекистон ва Буюк Британия терма жамоалари 4–14 сентябр кунлари Ливерпулда бўладиган World Boxing тарихидаги илк жаҳон чемпионатига тайёрланмоқда.
