Боб Арум: Ломаченкода бел муаммолари бор эди — у энг яхши формасида бўлмаса, рингга чиқмайди
Расм: gettyimages.com
Top Rank промоутерлик компанияси президенти Боб Арум енгил вазн тоифасида IBF ва IBO камарлари соҳиби бўлган украиналик Василий Ломаченконинг (18-3, 12 KO) фаолиятини якунлаш қарорини изоҳлади.
— Ломаченко — ҳақиқий спортчи, жиддий ва муросасиз жангчи. Аммо унинг белида муаммолар бор эди. Бу муаммоларни бартараф этишга уринишди, афсуски, бунинг иложи бўлмади.
Шу сабабдан у нафақага чиқишга қарор қилди. Василий ўзини энг юқори даражада намоён этолмаса, у рингга чиқмайди. Унинг қарорини тўлақонли тушунаман ва ҳурмат қиламан. У ҳам, отаси ҳам ҳақиқий профессионаллар. Қанийди, ҳар бир жангчи Ломаченко сингари бўлса, — деди Арум.
Эслатиб ўтамиз, 37 ёшли Ломаченко сўнгги жангини 2024 йил май ойида ўтказган ва унда Жорж Камбососни мағлуб этган эди.
Бакрадзе Иман
Редактор