Bob Arum: Lomachenkoda bel muammolari bor edi — u eng yaxshi formasida bo'lmasa, ringga chiqmaydi
Top Rank promouterlik kompaniyasi prezidenti Bob Arum yengil vazn toifasida IBF va IBO kamarlariga ega bo'lgan ukrainalik Vasiliy Lomachenkoning (18-3, 12 KO) faoliyatini yakunlash qarorini izohladi.
— Lomachenko — haqiqiy sportchi, jiddiy va murosasiz jangchi. Ammo uning belida muammolar bor edi. Bu muammolarni bartaraf etishga urinishdi, afsuski, buning iloji bo'lmadi.
Shu sababdan u nafaqaga chiqishga qaror qildi. Vasiliy o'zini eng yuqori darajada namoyon eta olmasa, u ringga chiqmaydi. Uning qarorini to'laqonli tushunaman va hurmat qilaman. U ham, otasi ham haqiqiy professional. Qaniydi, har bir jangchi Lomachenko singari bo'lsa, — dedi Arum.
Eslatib o'tamiz, 37 yoshli Lomachenko so'nggi jangini 2024 yil may oyida o'tkazgan va unda Jorj Kambososni mag'lub etgan edi.