Улуғбек Мирзаев: «Жуда жуда яқин турибмиз»
Sports24.uz бу сафар “Бунёдкор” ҳамда “Андижон” клубларининг собиқ директори, журналист ва иқтисодчи Улуғбек Мирзаев билан боғланиб, ўйин олди фикрлари билан қизиқди:
"Биринчи навбатда бу сафарги саралаш Жаҳон чемпионатига чиқиш учун саккизинчи уриниш ҳисобланади. Олдинги еттитаси муваффақиятсиз бўлган. Илк саралашдаги иштирокимиз 1997 йилда бошланган. 1998 йили Францияда бўлиб ўтадиган мундиал учун саралаш бўлган, аммо терма жамоамиз ижобий натижа қайд эта олмаган. Ўшанда саралашнинг ҳал қилувчи босқичига етиб борилган ва Япония, Жанубий Корея, БАА, Ўзбекистон ва Қозоғистон терма жамоалари бир гуруҳдан ўрин олиб, бизнинг терма жамоамиз гуруҳда қолиб кетиб, Жаҳон чемпионатига чиқиш вазифасини бажара олмаган.
Орадан йигирма саккиз йил ўтди, ортида қолган давр мобайнида Жаҳон чемпионати орзусида яшаб келдик ва ниҳоят ҳозир жуда жуда яқин турибмиз. Ўйлайманки, футболчиларимиз Бирлашган Араб Амирликлари билан дуранг ўйнаб кела олишади. Мен ҳам 1:1 ҳисобидаги дурангни тахмин қиляпман. Биласизми, Жаҳон чемпионатига чиқиш жуда кўп нарсани англатади. Чет элда кўплаб дўстларим, халқаро муносабатларим бор. Хорижлик ҳамкорларим, танишларим кутяпти. Агар Жаҳон чемпионатига чиқадиган бўлсангиз футболиңиз учун катта ижобий жиҳат бўлади деб таъкидлашмоқда. Бу терма жамоамизни мундиалга бориши, кейинги терма жамоаларимиз учун ҳам туртки бўлади, яъни олдин бу ишни уддалаганмиз-ку, нега энди 2030 йилги Жаҳон чемпионатига чиқа олмаслигимиз керак деган фикрлар бўлади. Бу эса секин-секин Жаҳон чемпионатида мунтазам иштирок этиш тенденциясига йўл очади. Футболимиз янада ривожланади. Футболчиларимизга хорижий клублардан бўлган қизиқиш янада ортади. Бу орқали Ўзбекистоннинг кучи янада ошади. Секин секинлик билан хорижда ўйнаётган ўзбеклар сони янада кўпайиб боради. Қанча хорижда бизнинг футболчиларимиз кўп ўйнаса, футболимизга шунча юқори баҳo берилади. Жаҳон чемпионатига чиқиш деганда, бир сўз билан айтганда, бу – мамлакат футболини янги босқичга кўтарилганлигини англатади.
Тўғрисини айтсам, бу авлодни олтин авлод дея олмаймиз. Ҳозирги терма жамоадан кўра, айтайлик, биринчи Жаҳон чемпионати саралашида қатнашган жамоани кучли деса бўлар эди. Қосимов, Шиквирн, Бугало, Давлетов, Ма’руфалиев, Лебедов, Бозоров, Ширшов – булар жуда кучли жамоа бўлган. Ундан ташқари эсимизда бўлса, Нестеров, Ҳайдаров, Жепаров, Кападзе, Гейнрих Бақаев, Шацких, Солиевлар давридаги терма жамоани ҳам энг кучлиси деб атаса бўлар эди. Бу йигитларнинг омади ҳам келди, қолаверса Жаҳон чемпионати иштирокчилари сони қирқ саккизтага етганлиги ҳам вазифани енгиллаштирди. Балки, қоидалар аввалгидек қолганида, терма жамоамизнинг мундиалга чиқиши яна қийин ҳолда қолиши мумкин эди. Шунинг учун квоталар сони оширилганлиги ҳам Ўзбекистонга йўл очмоқда деб айтиш мумкин.
Жаҳон чемпионатига чиқиш тажрибасини доимийга айлантириш учун, ўйлайманки, ўсмирларимиз ва ёшларимиз яхши чиқиб келмоқда. Терма жамоамизни енгил ўйнаётганининг яна бир сабаби кучли жамоаларда футболчиларимиз кўпайиб боришида деб айтсак ҳам бўлади. “Манчестер Сити”, “Рома”, “ССКА”, Туркия, Эрон, Саудия каби жуда кучли лигаларда ўйнашаётгани. Футболчиларимизни ёшлигиданоқ хорижий лигаларга чиқариб юборишимиз керак. Чунки у ерда янада чиниқишяпти ва кучайишяпти. Ўзимизни ички чемпионатни ҳозирда жаҳон даражасидаги кучли лига деб айта олмайман. Кўпроқ футболчиларимизни чет элдаги кучли клубларга жўнатсак, бу нарса терма жамоамизга фақат ва фақат фойда бўлади ҳамда Жаҳон чемпионатларида доимий иштирок этиш учун фойда бўлади. Буни амалда Япония, Корея, Австралия каби давлатларда кўриш мумкин. Масалан, Эрон ҳам шу йўлдан кетмоқда, натижада кучли футболчилар билан доимий мундиал йўлланмасини қўлга киритиб келмоқда. Лекин, Саудия, Амирликлар ёки Қатар кабилар ўз футболчиларини четга жўната олмаётгани учун ҳам бир чиқиб, бир чиқа олмай қолган вазиятларини кўрмоқдамиз. Қанча кўп футболчи Европага чиқса, бу ҳолат терма жамоамизни янада даҳшатли қиёфага олиб келади",-дейди мутахассис
