«Реал» бош мураббийлиги учун 5 та асосий номзод
Мадриднинг “Реал” клуби мавсум якунига етмасдан туриб, 2026/2027 йилги чемпионат баҳслари учун бош мураббий излашни бошлаган. Гарчи рўйхатда бир нечта топ мураббийлар ўрин олган бўлишига қарамай, “Реал” раҳбарияти якуний қарорни қабул қилгани йўқ. Қуйида “Реал” клуби шорт-листида турган бир нечта номзодларга тўхталиб ўтишга қарор қилдик.
Унаи Эмери
Унаи Эмери бир неча йилдан буён «Астон Вилла»да муваффақиятли иш олиб бормоқда. Жамоа жорий мавсум якунларига кўра АПЛ орқали бир йиллик танаффусдан сўнг Европа Чемпионлар лигасига йўлланма олиш арафасида.
Эмери Европа мураббийлари орасидаги юлдуз мақомини Севильяда қўлга киритди — у жамоа билан кетма-кет уч марта Европа Лигасини ютган. Шу билан бирга, у топ-клубларда ҳам ишлаган: 2016–2018 йилларда “ПСЖ”ни бошқарган, 2018 йил ёзидан 2019 йил кузигача эса “Арсенал”да фаолият юритган.
Париждаги фаолияти, айниқса, “Барселона”га қарши Чемпионлар лигасидаги машҳур 1:6 ҳисобидаги мағлубият билан эсда қолган. Бироқ иккинчи мавсумда у жамоа билан Франциядаги барча мусобақаларда ғалаба қозониб, «квадрупл»ни расмийлаштирган.
«Астон Вилла»да катта юлдузларсиз барқарор натижалар кўрсатиши Эмерининг яна бир бор топ-клубда ишлашга тайёр эканини кўрсатади. Бу жамоа билан Европа лигасида зафар қучиши мумкин.
Юрген Клопп
Юрген Клопп “Ливерпуль”ни ҳақиқий прессинг машинасига айлантирди. 2010 йиллар охири ва 2020 йиллар бошида мерсисайдликлар нафақат энг муваффақиятли, балки энг жозибали ўйин услубига эга жамоалардан бири бўлди.
Клопп билан «Ливерпуль» 2018/2019 мавсумда Чемпионлар лигасини қўлга киритди, ортидан эса Англия чемпионига айланди.
2023/2024 мавсумидан сўнг у клубни тарк этди ва ҳозирда “Ред Булл” тизимида менежерлик лавозимида ишламоқда.
Клоппнинг обрўси шубҳасиз юқори, аммо унинг номзоди ҳам саволлардан холи эмас. Биринчидан, у мураббийликка қайтишга тайёр эканини очиқ айтмаган. Иккинчидан, Винисиус Жуниор, Килиан Мбаппе ва Жуд Беллингем каби юлдузларнинг доимий прессинг тизимида ўйнаши қанчалик реал экани ҳам шубҳали.
Энцо Мареска
Энцо Мареска ўзининг илк мавсумидаёқ “Челси”ни Конференциялар лигаси ва клублар ўртасидаги жаҳон чемпионатида ғолиб бўлишига кўмаклашди.
Айниқса, у «кўклар»нинг кенг таркиби билан самарали ишлай олгани диққатга сазовор — бу эса ҳужум чизиғида кўп вариантларга эга “Реал Мадрид” учун фойдали бўлиши мумкин.
Бироқ 2025 йил охирида Мареска раҳбарият билан келиша олмай, ишдан бўшатилди. Яқиндаги катта ютуқлар ва яхши натижалар фонида бу қарор кўпчилик учун кутилмаган бўлди. Ҳозирда италиялик мутахассис ишсиз ва янги чақирувларни қабул қилишга тайёр.
Зинедин Зидан
Зинедин Зиданнинг келажаги Франция миллий жамоаси билан боғлиқ. Дидье Дешам 2026 йилги жаҳон чемпионатидан сўнг лавозимини тарк этишини маълум қилган. Журналист Фабрицио Романо эса Зидан Франция футбол федерацияси билан оғзаки келишувга эришганини хабар қилган.
Шу сабабли, унинг бу орзудан воз кечиши учун фавқулодда ҳолат юз бериши керакдек туюлади.
Бироқ “Реал Мадрид”да Зиданни доимо хуш кўришади. У мураббий сифатида жамоа билан жами 11 та соврин ютиб, ҳар икки марта ҳам клубни низосиз тарк этган.
Жозе Моуринью
Ушбу рўйхатда энг асосий номзод сўзсиз Моуринью ҳисобланади. Португалиялик мутахассис собиқ жамоасини қайта бошқаришга қарши эмас. Record нашри хабарига кўра, «қироллик клуби» португалиялик мутахассисни олиб келиш учун «Бенфика»га 7 миллион евро миқдорида компенсация тўлаши керак бўлади.
Манбага кўра, ушбу сумма Моуринью ва «Бенфика» ўртасидаги шартномада кўрсатилган бўлиб, томонлардан бири келишувни бекор қилмоқчи бўлса, айнан шу товон пули ишга тушади.
Қайд этилишича, мазкур банд фақат ушбу мавсум якунланганидан кейинги 10 кун давомида амал қилади.
Шунингдек, «Бенфика» президенти Руи Кошта Моуриниога янги шартнома таклифини тақдим этгани ва ҳозир жавоб кутаётгани айтилмоқда.
